Салдат Васьлöн пи

Талун сьöкыд гадайтны, кутшöм эськö олöм сылöн лоис мöд кадын. А Сöветскöй власьт вöчис сiйöс батьтöм-мамтöмöн. Сэсся тайö жö власьтыс быдтiс-велöдiс, кыпöдiс кокйыв, вöчис уджвывса геройöн. Me гижа войнаса ветеран, Ухта карса почётнöй олысь, странаса почётнöй нефтяник, Социалистическöй Уджвывса Герой Владимир Васильевич Ульныров йылысь.

Владимир Васильевич чужлiс 1924 воын Руч сиктын Салдат Вась семьяын. Батьыслы Салдат прöзвищеыс ляскысис сы вöсна, мый уна вояс чöж вöлi войнаяс вылын: роч-японскöй, первой мирöвöй, нöшта вит во — гражданскöй война вылын красногвардеецöн, красноармеецöн, партизанöн. Гортас локтic сöмын 1922-öд воын. А воюйтiгас на корсюрö кежавлic семья дорас, и чужлiс выль кага. Гöтырсö сиктын Салдат Вась Настаöн жö тöдicны.

Но войнаяс помасисны, кад воис босьтчыны уджö. Салдат Вась ньöбис кöрт гöр — семьялы донатор. Кöсйис ачыс аслыс уджавны, колхозö пырöмысь пыксис. Но Сöветскöй власьтыд, кодöс сiйö тшöтш шедöдiс уна во чöж киын öружиеöн, лыддис единоличникöн, джагöдiс вотъясöн. Салдат Васьлöн гöлиник керкаысь мынтытöм вот весьтö чышкыштiсны-нуисны ставсö. Весиг емъяс, сы вöсна мый кöрт, ньöбöм. Куш картасьыс нин, мöс куйöд улысь аддзисны и кöрт гöрсö. Шогысла Салдат Вась сэсся эз и вермы прамöя овмöссö кыпöдыштны, а 1934 воын ачыс кок йывсьыс усис да кувсис.

10 арöса Володя 26 арöса вокыскöд мунiсны карö кынöмпöт шедöдны. Сэнi и збыльысь вöлi быдсяма сёян-юаныс, кутшöмöс сиктысь он аддзыв: гöгрöс тупöся рудзöг нянь, кöлач, шыдöсъяс, сакар. Дерт, быдлаын кузьысь-кузь öчередъяс. И сьöмтöг нинöм он босьт. Вокъяс нажöвитчисны. Гортоплы пилитiсны пес карсянь 13 километр ылнаын. Сетiсны 8 шайт быд кубометрысь. Олiсны му пиö кодйыштöм чомйын, тшыгъялiсны, висисны. Но веськавлiсны и нажöткаа медасьöмъяс. Öтчыд войöн нажöвитiсны 40 (!) шайт: ывлавывса нужникысь кералiсны да новлiсны кын сьöкыд глыбаяс. Олöмыс вайöдiс Володяöс и корны магазин öдзöс дорын, да жаляддза кодсюрö сетлiсны ки нюжöдöм зонкалы. А сэсся велалiс магазинъясысь чекъяс выльмöдны да на вылö ньöблывлiс нянь либö кöлач. Видзöдчö нин вöлi шоныд костюм вылö, но милиция тшапнитiс. Сэсся мöдысь, коймöдысь… Сылöн писькöслунöн да киподтуйöн вермис быдмыны ыджыд мошенник либö сiдз шусяна «вор в законе». Но ставсö крута бергöдiс öш. Зумыш видзöдласа да ён сюръяса, кодi шöйтiс карса уличаяс кузя. Тайö öшкыс люкалiс Володялысь воксö кувмöныс. Пи радиыс карö локтiс мамыс сизим арöса нылыскöд, корсис олан пельöс, медасис йöзлы кöлуй пеславны, а Володяöс ceтic школаö. Сiйö сэсся вобыд вöлi отличникöн. Но мöд вонас мамыс бöр мунiс сиктö. Пароход палуба вылын кынмöма да гортас вит лун мысти и кулi. Володя чойыскöд мунöны сикт кузя — воча локтöны нывбабаяс. «Мый нö, бöр локтiнныд?» — юасьöны.. «Локтiм, вежон сайын». «А мамныд кöн?» «Гортын джодж вылын куйлö. Тöрыт кулiс». «Батюшки, матушки», — шызисны бабаяс, шыблалiсны куранъяссö да котöртiсны кулöм мортöс идравны.

Дзебисны Салдат Вась Настаöс, а мöд лунас 12 арöса Володялы да 9 арöса чойыслы сетiсны бумагтор: «Со, челядь, тöвзьöй детдомö. Сiйö орчча Дереваннöйын. Мунöй туй кузяыс пыр веськыда, некытчö энö кежöй».

Воисны кыдзкö. Бур, мый абу ылын -12 километртö подöн вуджисны.

«Детдомын олан воясыс, — казьтывлö Владимир Васильевич, — менам вежöрö колины шудаöсь. Кытшалiсны тöждысьысь йöз. Пывсьöдiсны-мыссьöдiсны, кöмöдiсны-пасьтöдiсны. Вердiсны куимысь лун, сетлiсны корсюрö кампета чай. Котралiм школаö, велöдчим фотографируйтчыны, велосипедöн ветлыны. А сэсся менö, кыдз отличникöс, мöдöдiсны Ухтаса горно-нефтяной техникумö. Но сiйöс тупкисны, помалi ФЗО, сетiсны буритчысьлы отсасьысьлысь специальность, да кык во буритi, дзоньтaлi Ухта гöгöр нефть перъян скважинаяс».

Да-а. Тайö вöлi зэв важöн. Сэсся суис Отечественнöй война. 1942 вося август заводитчигöн Владимирöс босьтiсны. Вöлi сылы 18 арöс.

Война йылысь казьтывлö скупа. Война вылö, салдат подвиг вылö сылöн аслас видзöдлас. Весиг наградаяснас оз ошйысь, юалöм вылö неокотапырысь висьталö:

— «За отвагу» медаль мыйысь? А, Резекне кар дорйим. Me вöлi нин Главнöй командованиелöн резервысь гвардейскöй истребительно-противотанкöвöй артиллерийскöй полкса первöй öрудиеса командирöн. А тышкасим сэки фашистъяслöн танкъяскöд, да вит самоходка на зырис-локтiс. Орудиеяснымöс петкöдiм да лыйлiм веськыда. Командиръяс донъялiсны, мый дорйысим бура. И наградитicны. Кымынöс бырöдiм? Лыддьынысö кадыс эз вöв: яндзим тöдтöг локтöны и локтöны, а ми таысь скöрмим да дугдывтöг лыйлiм. Главнöйыс — эгö лэдзöй водзö. Помас нин менö ачымöс буракодь тракнитiс: воштi садьöс, сутки сайö дзикöдз пельтöммывлi, кывворöй бырлiс.

А Слава орден кузя кö — тадз вöлi: армиялöн команднöй пункт Рига дорын веськалic джынвыйö враг кытшö. Меным тшöктiсны лыйлыны враглысь миномёт батареяяс кузя. Фашистъяс дзик нин матынöсь вöлiны КП-сянь да лыйсьыны ковмис зэв стöча — быд здук, быд лыйöм вöлi дона. Me ачым вöлi тшöтш наводчикöн и лыйсьысьöн. Миномётнöй батареяяс вермим бырöдны. Армияöн командуйтысь генерал тайö тышсö донъялiс вылö да мöд лунас сетiс тайö орденсö.

Кыдз быттьö ставыс зэв прöстö. Босьт сöмын став кывкутöмсö команднöй пункт дорö матыстчысь враг батарея бырöдöм вöсна! Либö петкöд ассьыд пушкатö восьса позиция вылö, враглы воча, да пызйы ён фашистöс! Кажитчö — прöстö. Сэсся воинлöн вöлi повтöмлун, Родина дорö муслун, и олöм сьöкыдлунъясыс удитiсны нин öжигайтны том зонмöс.

Видзöдлöй война воясся фотография вылас. Тайö сiйö, дзик на том младшöй сержант Володя Ульныров, кодi медсьöкыд здукас петкöдiс ассьыс пушкасö да упор лыйлiс фашистлысь танкъяс, самоходкаяс, медым найö водзö эз талявны миянлысь чужан му.

Владимир Васильевичлы войнаыд — абу сöмын лыйсьöм, подвигъяс, победалы салютъяс. Лыйсьылiс? Да, восмöн. 1944 вося öти тышын лэдзисны 450 снаряд. Дерт, и приказыс вöлi «беглый огонь». Но война кадад сылы сюрлiс и сьöкыд удж, и салдатлöн страдайтöмъяс. Татшöмöн сiйö вöлi 1945 вося майöдз, война бöръя лунъясöдз, Восточнöй Пруссияöдз. Мыйта сiйö кодйис мусö! Первой «санпропусклы», сэсся — пушкаяслы, блиндаж улö. Татшöм вöлi ён пöрадок быд позиция вежöм бöрын. “Санпропусклы” гу кодйисны пыдö, пöката вевтöн. Ки улö кӧ вевт вылас эз сюр вöрыс, вевттьылiсны брезентöн, тшын петанiн сöмын кольлiсны. Гуас бипур öзтывлiсны, ыджыд кöрт бöчкаын ва пузьöдлiсны да сэтчö шыблалiсны пуöдны ставсö — вылыс кöлуй, гимнастёрка, гач, шынель. А асьныс пасьтöг йöжгылясисны. Зато мыськöм бöрын недыр кежлö тойясысь мынлiсны. Сы мында йывмывлiс тайö паразитыс, мый паськöм вывтi весиг ветлiсны. Öтчыд, школьникъяскöд аддзысьлiгöн, учительница корис Владимир Васильевичöс тойяс йывсьыс не казьтывны — абу пö лöсьыд. А войнаыс нö лöсьыд, бур? Либö кынмöмсьыс да тшыгъялöмсьыс туша пасьтала чирейяс йывсьыс сiдзжö эз позь висьтавны? Абу лöсьыд и аслыс: казьтыштас, да зывöкысла йирмöг босьтлö. Но войнатö он красит. Быдсяма страксö и зывöксö сiйö вайис. Öтчыд, сьöкыд тыш бöрын, здук сюрис шойччыштны. Бöрйисны овтöм керка. Владимир буретш контузитчöма вöлi, юрыс бepгaлic, да пeтic ывла вылö. И друг враглöн снарядыс веськалiс керкаö. Трах-тарарах! — кылic. Джын стрöйбасö пызнитiс. Видзöдö: быттьö мусяньыс кодкö остатки керкасö кyтic летны, киссьыны кyтic. Би, тшын! Котöртiс пытшкас. А сэнi салдатъяслöн ымзöм, горзöм, матькöм. Кодкö — китöм, мöд — коктöм, кодъяслöнкö сювйыс петöма, унаöн абу нин ловъяöсь. Вот стракыд! Тышад тöдан мый вöчны. А тайö пöрйö — шöйöвошис. Но öдйö палялiс да босьтчис отсавны кöртавлыны.

Да, войналöн чужöмбаныс абу мича. И висьтавны колö дзебтöг, мичмöдтöг збыльсö, мед йöз сьöлöмын пузис враг вылö лöглун. Войнаяс панöны оз салдатъяс да лейтенантъяс, а политикъяс да генералъяс. Салдатъясöс петкöдöны нин вермасьны, тышкасьны, наöн потшöны вöрöглы туй. Великöй Отечественнöй война вылын вермöм шедiс ыджыд воштöмöн — уна йöз кулöмöн. Корсюрö волö мöвп: Победа лунсö кыпыда-ö пасйыны, али кулöмаяс-виöмаясöс шогöн казьтывны?

Владимир Васильевич мирнöй уджö кутчысис 1947 вося майсянь. Первой отсасис буритчысьлы, а 1949-öд восянь — ачыс бурöвöй мастер. Куим во мысти 26 арöса мастер йылысь бур слава паськалiс нин республика пасьта. Бригадаыс вобыдся задание тыртiс 1,5-2 пöв. Подулыс — бура удж котыртöм, ён дисциплина, корсьысьöм да выльторъяс пыртöм. Буретш сылöн бригадаыс Комиын медводдзаысь босьтчис буритчан вышка новлöдлыны демонтажтöг, медводз жö пыртiс турбинаöн буритчöм. 1957 воын Сöветскöй Союзын медводдзаысь кодйис выль ногöн вит скважина, мыйöн видзтiс 1 миллион 200 сюрс шайт. Тайö сэки вöлi ыджыд сьöм, мый вылö позис кыпöдны уна судтаа кык ыджыд керка. И кымын на мукöд выльтор вöлi гижöдын казьтывтöмыс. Сылöн тшöт вылö кö видзтöмасö вуджöдны, Владимир Васильевич эськö лои медся озыр мортöн. Но донъялiсны уджсö сылысь эз сьöмöн, а наградаясöн: «За трудовое отличие» медальöн, Трудöвöй Краснöй Знамя орденöн, Социалистическöй Уджвывса Герой нимöн, сетiсны Ленин орден да «Серп и молот» зарни медаль.

Тайö вöлi важöн. А кыдз олö нималана морт, войнаса да уджвывса герой, Ухтаса почётнöй олысь, странаса почётной нефтяник талун? Владимир Васильевич öнi шедöдöм шойччöг вылын, но водзö на пуктö пай общественнöй олöмын. Висьöдчö. Ветлыны эськö сылы кытчöкö ылöджык — Кипрö либö мöдлаö, кöнi позьö бурмöдны дзоньвидзалун сэтчöс сынöднас, вына ванас. Но мый вöчис, экономитiс, ставсö сетöма страналöн öтувъя кöшельö. А аслыс озырлун эз и шедлы: абу машина ни дача. Багамскöй дiяс вылад ветлöны мукöдъяс, кодъяс ульныровъясöн, якимовъясöн да мукöд зiль йöзöн нажöвитöмсö гусялiсны, асэмбуралiсны да лышкыда олöны. В.В. Ульныровлы весиг пенсиясö сетлiсны зэв ичöтöс, этшаджык меысь, радöвöй ветеранысь, кодi эг тöдлы войналысь тыш. Сöмын дыр корсьысьöм бöрын неуна содыштiс.

Со öд кыдзи овлö. Нималiс, кор уджалiс. А мыйöн пöрысьмис — лои тыдавтöмöн. Кöть пыр шуам: «Некод эз вун! Нинöм эз вун!».

Борис Шахов

 Парма гор, 1999, Май 18 лун.